شو بنا نحكي تا نحكي..فلاحين وهون عايشين ومكيفين

مسا الخير..لكل اعضاء الريف ...معكم بكرة احلى ......

الموضوع اليوم رح يكون ..شو بنا نحكي تا نحكي...هيك كان العنوان ..اجا في بالي

شفتها كلمة فلاحية بتعكس في كلماتها البسيطة بساطة اللي بحكيها ..وبساطة الريف

هان ...حبيت تكون مشاركتي في النقاش الحاد....عكس اشي تعودنا ناقشوا...

احنا اخر فترة كنا كثير...نعلق وننتقد بعض التصرفات والسلوكيات والمواقف هون في مجتمعنا..وانا والله واحد منكم..

حكيت واعلقت وانتقدت... بس برضو في شغلات حلوة .....بنلقاها ومستحيـــــــــــــــــل نلقاها في مطارح ثاني

في عنا يا جماعة ....للي ربنا مهدي بالو حياة كثير هادي وحلوة ...أرض وعشب وزيتون وقمح وجبال ووديان

في كمان جو صافي حلو .. ما في ازعاج.... في موسم قطف زيتون ...وموسم حصيدة ..وموسم برقوق اخضر وموسم لوز أخضر

وفي كمان أرض فيها الخير ....بنزرعها ممكن بصل ونعنع وبقدونس وبندورة وخيار وفكووووس ..وبنقطف الاشي وبنوكلو عطووول

حتى شجر الحامض((الليمون)) كثير حلو والحب عليه اصفر وكبير وكثير ....اذا بتطلع عجبل المكر...يعني زي ما بحكوا ..جبل ابو صبيح

الله يرحمو...رح توكل تفاح أخضر كبير ...طعمو بجنن...واذا بتنزل شوي عالتلة اللي جنبو..رح تلقى هناك شجرة برقوق (خشم العجل)

لونها احمر...طعمها تحفة...ومليان هناك برقوق ونجاص وخوخ ومشمش.... اللي بروح هناك يوكل ما بزعلوا صحابهن عمسؤوليتي..

بس مش تقعد تعبي كياس..هيك بصير حرام .والتين وانواعو ومشتقاتو

..صحيح قبل ما انسى في اشي هالايام موسمو مع البرقوق الاخضر .

. اللي هو الحمص

الاخضر والهويسة وما ادراك ما الهويسة ...بتعرفو الوصفة وطريق تحضير الهويسة ....مش صعبة..ما في اشي صعب عنا

كل شي سهل .... حتى رغيف خبز الطابون الكبير وشوية زيت وزعتر وحبة رصيع وبصل أخضر ...وابريق شاي عالنار..مش عالغاز.

اكيد برضو نعمة كبيرة كل هالاشيا نحمد ربنا عليها....مين هون بحب ريحة الطوابين؟؟؟؟؟ والتراب.... ؟؟؟؟ والجفت؟؟؟؟ والارض ...

وريحة الشتا؟؟؟؟ وريحة معصرة الزتون في موسم الزتون.....؟؟؟أنا بحب هاي الروائح كلها..... وكل موسم هون الو ريحة خاصة فيه..

يمكن اللي هون بعرفو هالاشي وبحسو فيه ..حتى المغتربين....اللي سكنو هون وعاشو هون ...

ما بنسو كل هاي الاشيا الحلوة اللي بحكي عنها...وريحة الميرمية ..يوم نقطفها والزعتر ...من وادي الشاعر وعمورة بنجيبها..

صحيح قبل ما انسى ...في شغلة كثير حلوة ....اللي هي ..انك تروح عند الجاجات تلقط بيض .... وتحلب النعجات ...وتعمل جبنة ولبنة

...وتوكل من تعبك ...وتشرب من مية عين القصب ....ينابيع صافي في الجبال..... ما بزبط نمرق منها وما نميل نغسل

وجوهنا ونتوضا ..ونشرب من المي اللي فيها..مهي دايما باردة.... حتى لو طلعت اشاعة الفترة هاي انو المي في عين القصب

لا تصلح للشرب....خبراء ومش خبراء وحكي فاضي..... هاد مع الفلاحين ما بزبط..النا الف سنة بنشرب وبنغسل منها... وامياتنا وستاتنا

طول عمرهن بملين منها..... وما في تسمم ولا في حكي فاضي..... المهم أمان ................................وكمان عمسؤوليتي

آخر اشي ..ظل اكم صورة حلوة .... أنا شخصيل بحبها كثير وهي صور الكبار .... اللي لساتهم بيناتنا بروحوا وبيجوا في الزمن هاد وفي

ذكريات زمان ...لبسهم وطريقة أكلهم ونومهم وحكيهم وتصرفاتهم...... لسة الزمن الحلو مبين في طيبتهم وضحكاتهم

حتى الأمل بنلقاه في نظرتهم للاشيا اللي بتصير ...مفرفشين وقويين لساتهم رغم تعبهم الكبير في مشوارهم الطويل...ختياريات .

لسة العصبة الخضرة عصباحهن والشداد الاحمر عوسطهن ..ودمايات ....مش كثار ...بس لساتهن موجودات ...
.....

بكفي لهون ....هاي اكم صورة بتثبت انو حكيي مزبوط ومش جايب اشي من دار ابوي..............


اول صورة لجارنا الكثير محترم ...ومرتب ..أبو نادر ....




ابو نصري طبعا...زلمي كثير حلو ..وطيب ....ومرتو اسمها معزوزة





يوسف بشير...الابتسامة ما بتفارقو



ابو قدري طبعا



ابو نايل الله يرحمو ......ما الها طعم الحارة بلاه وخاصة دكانتو



تركيا..هيك اسمو ابو عيسى ..مهم كثير في البلد ..وما بنتخيل حارتهم بلاه



سميح أبو خلف ..زلمي تعب كثير في حياتو ..خاصة في ارضو




عبدالله ابو عوض....اخو تركيا



عاليمين ابو معروف ...زلمي تحفة ..وفي موسم التين بتلقاه نشيط عالآخر
ومن الجهة الثاني ابو حسين جارنا الطيب



أحلى واطيب جار ابو خالد....فوق زلمي كبير كثير في العمر تقريبا 100 سنة ولساتو بروح وبيجي عالمسجد




وأخيرا جميل العرسااان..يعني ابو جمال وكمال وبلال وصالح .....اللي جنبو مش مبين مليح هاد صبحي ابو صد ربنا يرحمو..ولا أحلى من سلامو




هدول الثلاثي المرح بعرفهن وصحبة انا وياهن ..طبعا مش من بلدنا هدول من اللبن الشرقية ...باب سوبر ماركت ضراغمة ..
هاي الناصحة ست واحد صاحبي اسمو سائد ..وكيلة جرار الغاز في اللبن ..واللي عقد حالو يجرب يخربط معها في شيقل ..

يا كشيل امو




هسا هيك خلصنا صور كبار..واللي ما في الو صورة لسيدو ما يزعل ..لأنهن معظم الصور صورتهن في المضافة اللي في حارتنا

أكيد بس يكون في صور رح أضيف ......

هسا هيك بس أكم صورة عالسريع ..لأجواء السراحة .....فاهمين شو يعني سراحة



هاي الغرفة لزلمي اسمو ابو نزيه ..سيد يوسف ... المطرح في جبل قصر عيد قريبة عدار سامح..كثير كنا نوخد مي من عندو يوم نروح هناك انا ويوسف ..وهو ما كان يقصر والله ....حتى أحيانا كنا نوخد شاي ...وقداحة



ابريق الشاي هاد ما رح احكي عطعمو ..ولا عن طريقة تحضيرو معروفة لكل الفلاحين الاصيلين....
بس رح احكي عن المطرح ..هو واد رمح تحت جبل القليلة عطريق تلفيت.... ليش سموه واد رمح ما بعرف ..
بس واحنا نجد هناك كنا نخترع اسباب انا واخوي لتسميتو اشي هبل ما رح احكيه



وصلنا لأعلى نقطة في قبلان ..جبل المكر.... شو معنى كلمة مُكر ؟؟أنا بحكيلكم المكر هو حفرة في الصخر كانت تتملى مي في
الشتوية بصير نشرب منها ..ولا أزكى من المي اللي فيه..عجبتني النتفة هاي صورتها ما بعرف مين صحابها..بس عراس جبل المكر المطرح





المكان ..السهل الغربي ...الزمان.... والله ناسي أما من زمان ...مشروع افطار أنا وعلاء جنب الحمموت ...والخبز والبصل والرصيع وووومن خالتي ام ياسر جارتهم ربنا ما يحرمنا منها ...............



برضو من جبل المكر وقت الغروب .....خلي الصورة تحكي أنا مش رح احكي






يعطيكم العافي .بكفي هيك.الموضوع قبل ما انسى حصريا وخاص جدا لمنتدانا الغاالي

1000 شكرا ..... سامح فري دوم جرين ايز والاستاذ ابو عبادة...

ردودكم اعطت المشاركة طعم ......وزادتها ..... وانا كمان بحكي انو الخير لسة موجود

بس احنا نطوّل روحنا شوي عالحياة ..وهي أكيد فيها اشيا حلوة كثير ..بنلقاها في

هالشغلات البسيطة اللي كنت احكي عنها

تحياتي قبلاني المحترم على ردك الحلو مثلك ,,, وكمان اختنا المستبدة ...... شرفتوا المشاركة بطلتكم الحلوة

و شكر خاص لأبوكي أختي المستبدة...نور المنتدى والمشاركة اكيد ....

اقتباس :

..حتى المغتربين....اللي سكنو هون وعاشو هون ...

ما بنسو كل هاي الاشيا الحلوة اللي بحكي عنها...

شكرا الك بكرى احلى والله موضوعك نـــــــــــــار من الاخر صراحه
اشي بجنن انك تكون فلاح بس الله يعين الي متغربين بوكلو هوى
اذا اجينا عندكم وشفنا التفاح الاخضر و ليمون طبعا هاد الي بنلحقو في الصيف بنهلوس و بحكيلنا ابوي احنا هاد ما بنشوفو الا في التلفزيون ....(طبعا بتهبل علينا ) و بكفي المخلل اي عندكم
طعمو ما بروح من بالي

كمان شكرا على صوره سيدي جميل عرسان والله اني كتير مشتاقلو

[b]عنجد ابو كريم يعني موضوع جميييييييييييييل جدا
بصراحه احلى موضوع انعرض على هذا المنتدى
تعجزالكلمات عن شكرك على الموضوع المميز تستحق اجمل الردود
ومشكور كثييييييييييير
وعجبني تعليقك على ( صبحي ابو صد ربنا يرحمو..ولا أحلى من سلامو)
جد ولا احلى ولا اروع من سلامو الله يرحم اموات المسلمين اجمعين

]quote]

موضوع بجنننننن


خلانا نحس بقيمه قبلان

بصراحه وانا اقرأ بالموضوع حسيت انو البلد بتجنن [/quote]

مشكورة همس .... أعطيتيني ثقة زيادة بموضوعي..

أنا كمان انبسطت كثير لأنو موضوعي أعجبكم


تحياتي أختي همس

كتييييييييييييير حلو مجتمع الريف عندكم بجد شوئتني لأجرب واعيش يوم متلكم هيك واعمل نفس اللي بتعملوه .
يسلمو ايديك على الموضوع فكرتك لكتابته بتزنن
بس هدول كلمات مافهمتهم شو معناهم؟(الهويسة ،وحبة رصيع ،ريحة الطوابين،والجفت)
وتأبل مروري

يسلمو ايديك لردك الي سامح
تيب ليه بتدئو الزيتون ؟

اول شي مشكور بكره احلى عع الموضوع الاكتر من رائع
واكيد بيجنن ما دامو من الريف وكبارية الريف مهع انو سيدي مو فيه

بس جد بيجنن واعجبني كتير واغلبهم عرفتهم


تاني شي يا همس انا مو كتير بعرف طريقة صنع الزيتون
لانو كنت صغيره وكانو يطروني لا العبلهم فيهم
بس يمكن بيدقوه عشان يروح مرارو ويتخلل فيه اليمون والفلفل
اذا غلط احكولي

يعني لما بتدئو الزيتونة بيدخل فيها ملح
تيب وبعدين شو بتعملو بعد ماتدئوها ؟(أنا كتيير حابة اتعلم منكم اشياء بس ازا بدايئكم بلاها)

اقتباس :

يعني لما بتدئو الزيتونة بيدخل فيها ملح
تيب وبعدين شو بتعملو بعد ماتدئوها ؟(أنا كتيير حابة اتعلم منكم اشياء بس ازا بدايئكم بلاها)

بعد ما ندق الحب بنحطو في قرطوس (مرتبان كبيير) او في كزايزا

وبندير فوقهن مي وملح وشرحات ليمون

بس بألاول بنحط في قاع القرطوش عروق يانسون (مشان يعطي نكهه )

وكمان ع باب القرطوس كمان شويه يانسون

وبسكرو وبنضغطو منيح منيح مشان ما يفوت عليه هوا

وبعد فتره طوييييله بنفتحو وبكون طعمو طيييييييييييب وبنوكلو مع الغدا او العشا